SEXIALITE DAN POLITIK EK POLITIK SEXIALITE
Laplipar politisien zot swa gos, swa timid, swa ipokrit lor kestion sex. Souvan zot ensilte zot
adverser ar bann expresion ki liye ar sex ousa aktivite sexiel. Le premie Me 2012, enn misie
ki dir li pe vinn sov pei, ti servi virzinite kouma norm pou diskalifie so adverser e so nouvo
alye ek disip ti aplodi. Ki signal zot pe avoy bann zenn (tifi, garson ant 15 ek 24 an dapre
NasionZini)? Abstinans, abstinans ek ankor abstinans? Sex enn zafer malang? Sex li enn
pese? Eski bann zenn pou ekout sa kalite koze la? MO PA KWAR. Li kler ki laplipar politisien
zot depase net. Bann zenn ena enn lot regar lor sex ek sexialite.
Sexialite li aktive par dezir ek li donn plezir. Reprodiksion (gagn baba) li segonder. Se sa kiltir
bann zenn. Ki devwar bann adilt dan tousa? Si nou kwar sermon ek represion pou sanz lespri
bann zenn, nou pe anbet noumem. Preferab nou ansengn zot bann prekosion ki zot bizen
pran pou evit maladi ek groses non-dezire.
Dan leker egalite jennder ena enn nouvo konsepsion, latitid ek kiltir ki nou bizen devlope.
Zom pa pou kapav kontrol sexialite fam. Si zom ek fam egal, zot liberte sexiel osi li bizen
egal. Domine par ideolozi patriyarkal, mazorite zom refiz aksepte sa e akoz sa zot souvan
vinn violan.
Egalite jennder vedir osi ki nou bizen respekte oryantasion sexiel bann dimoun. Bann ge ek
lesbienn zot bizen osi kapav viv zot sexialite libreman. Zot 'si zot zanfan Bondie.
Ena enn travay pozitif ek progresis ki pe fer pou permet plis fam partisip aktivman dan lavi
ekonomik, politik, sosial ek kiltirel nou pei. Sak sitwayen responsab, sak politisien progresis
bizen ankouraz sa devlopman la par so konportman ek langaz ki li servi. Zis bann lespri
kabose ki refiz konpran sa.
Nouvo devlopman, emansipasion bann fam, liberte sexiel vedir ki nou bizen transform nou
kiltir pou ki nou kapav viv enn lavi anrisisan fizikman, spiritielman ek moralman.
05.05.2012
